بابر اعظم پر ہراسگی کا الزام لگانے والی خاتون کو عدالت میں طلب کر لیا گیا

لاہور ہائیکورٹ نے قومی کرکٹ ٹیم کے سابق کپتان بابر اعظم پر ہراسگی کا الزام لگانے والی خاتون کو عدالت میں طلب کر لیا ہے۔

تفصیلات کے مطابق لاہور ہائیکورٹ کے جسٹس اسجد گھرال نے سابق کپتان کے خلاف ہراسگی کا مقدمہ درج کرنے کے عدالتی حکم پر سماعت کی۔ جج صاحب نے آئندہ سماعت پر مدعی خاتون کو طلب کرتے ہوئے تفتیشی افسر سے خاتون کا بیان بھی لکھ کر پیش کرنے کا حکم دیا ہے۔ عدالت نے واضح کیا کہ اگر درخواست گزار آئندہ سماعت پر پیش نہ ہوئیں تو فیصلہ کردیں گے۔

خیال رہے کہ عدالت نے بابر اعظم کی درخواست پر 2021ء سے حکم امتناعی جاری کیا ہوا ہے۔

سماعت کے دوران وکیل بابر اعظم نے کہا کہ خاتون نے کرکٹر کیخلاف ہراساں کرنے کے الزامات لگائے تو ایڈیشنل سیشن جج نے خاتون کی درخواست پر مقدمے درج کرنے کا حکم دے دیا۔ ایڈیشنل سیشن جج نے حقائق کے برعکس فیصلہ دیا۔

وکیل نے استدعا کی کہ بے بنیاد الزامات لگا کر درخواست گزار کی شہرت کو نقصان پہنچانے کی کوشش کی گئی۔ ایڈیشنل سیشن جج کا فیصلہ کالعدم قرار دیا جائے۔