سہہ فریقی سیریز: فخر زمان کی 84 رنز کے ساتھ شاندار واپسی

لاہور: قومی کرکٹ ٹیم کے اوپنر فخر زمان کی شاندار واپسی، سہہ فریقی سیریز کے پہلے میچ میں نیوزی لینڈ کے خلاف 84 رنز بنا کر آوٹ ہوگئے۔

331 رنز کے ہدف کے تعاقب میں پاکستان کی نیوزی لینڈ کے خلاف بیٹنگ جاری ہے۔ قومی ٹیم نے 26 اوورز میں 4 وکٹوں کے نقصان پر 130 رنز بنا لیے ہیں۔ بابر اعظم 10، کامران غلام 18، کپتان محمد رضوان 3 رنز جبکہ اوپنر فخر زمان 84 رنز بنا کر پویلین لوٹ گئے۔ ان کی اننگز میں 7 چوکے اور 4 چھکوں شامل ہیں۔

واضح رہے کہ نومبر 2023 کے بعد فخر زمان کی پہلی نصف سنچری ہے۔ نومبر 2023 میں فخر زمان نے انگلینڈ کے خلاف آخری ون ڈے ورلڈ کپ میں کھیلا تھا۔ فخر زمان نے نومبر 2023 ورلڈ کپ میں بھی نیوزی لینڈ کے خلاف سنچری سکور کی تھی۔

اس سے قبل نیوزی لینڈ نے پہلے کھیلتے ہوئے مقررہ اوورز میں 6 وکٹوں کے نقصان پر 330 رنز بنائے تھے۔ نیوزی لینڈ کی جانب سے کین ولیمسن 58، راچن رویندر 25 اور ڈیرل مچل نے 81 رنز بنائے۔ نیوزی لینڈ کے گلین فلپس 106 رنز پر ناٹ آؤٹ رہے۔

پاکستان کی جانب سے شاہین آفریدی نے 3 کھلاڑیوں کو پویلین کی راہ دکھائی۔ ابرار احمد نے 2 جبکہ حارث رؤف نے 1 وکٹ حاصل کی۔