امریکی آرمی چیف جنرل رینڈی جارج برطرف، نئی قیادت پر غور شروع

امریکی وزیر جنگ پیٹ ہیگسیٹھ نے آرمی چیف آف اسٹاف جنرل رینڈی جارج کو عہدے سے ہٹا دیا ہے، جس کے بعد امریکی فوجی قیادت میں اہم تبدیلی سامنے آئی ہے۔

امریکی میڈیا رپورٹس کے مطابق وزیر جنگ ایک ایسے آرمی چیف کی تقرری چاہتے ہیں جو فوجی پالیسیوں میں ڈونلڈ ٹرمپ اور ان کے اپنے وژن کے مطابق کام کر سکے۔

جنرل رینڈی جارج اس سے قبل سابق امریکی وزیر دفاع لائیڈ آسٹن کے سینئر ملٹری اسسٹنٹ بھی رہ چکے ہیں اور انہیں ایک تجربہ کار فوجی افسر سمجھا جاتا ہے۔

ایران نے امریکی اور اسرائیلی اہداف پر بڑے حملے کیے

انہوں نے اپنی فوجی خدمات کے دوران خلیجی جنگ، عراق اور افغانستان کی جنگوں میں بھی حصہ لیا، جس سے ان کے وسیع عسکری تجربے کا اندازہ ہوتا ہے۔

عام طور پر امریکا میں آرمی چیف آف اسٹاف کی مدت چار سال ہوتی ہے، تاہم جنرل رینڈی جارج نے 2023 میں سینیٹ سے توثیق حاصل کی تھی اور ان کی مدت 2027 تک جاری رہنی تھی۔

دوسری جانب، وائس چیف آف اسٹاف کرسٹوفر لانیو کو قائم مقام آرمی چیف آف اسٹاف مقرر کر دیا گیا ہے، جو عارضی طور پر اس ذمہ داری کو سنبھالیں گے۔

تجزیہ کاروں کے مطابق یہ فیصلہ امریکی دفاعی پالیسی میں ممکنہ تبدیلیوں کی نشاندہی کرتا ہے اور آنے والے دنوں میں فوجی قیادت کے حوالے سے مزید اہم فیصلے متوقع ہیں۔