آئی سی سی کا 2028 اولمپکس کے لیے چھ ٹیموں والا ٹی20 کرکٹ منصوبہ

دنیا بھر میں مقبول کھیل کرکٹ ایک طویل عرصے کے بعد ایک بار پھر اولمپکس کا حصہ بننے جا رہا ہے۔ انٹرنیشنل اولمپک کمیٹی (IOC) نے 2028 میں امریکہ کے شہر لاس اینجلس میں ہونے والے اولمپک گیمز میں کرکٹ کو شامل کرنے کی باضابطہ منظوری دے دی ہے۔ اس فیصلے کے بعد کرکٹ مداحوں کے لیے یہ کسی جشن سے کم نہیں۔

اولمپکس 2028 میں کرکٹ کو جدید ترین اور مختصر ترین فارمیٹ یعنی ٹی 20 میں کھیلا جائے گا۔ ٹورنامنٹ میں مردوں اور خواتین کی چھ، چھ ٹیمیں میدان میں اتریں گی، جو دنیا بھر کے شائقین کو زبردست ایکشن اور سنسنی خیز لمحات سے بھرپور تفریح فراہم کریں گی۔

کرکٹ کو اس سے قبل 1900 کے پیرس اولمپکس میں شامل کیا گیا تھا، جس کے بعد یہ کھیل کبھی بھی اولمپک مقابلوں کا مستقل حصہ نہ بن سکا۔ تاہم طویل جدوجہد، بڑھتی ہوئی عالمی مقبولیت اور آئی سی سی کی بھرپور کوششوں کے بعد اب کرکٹ ایک بار پھر عالمی اسٹیج پر لوٹنے جا رہی ہے۔

سنگاپور میں ہونے والے آئی سی سی کے حالیہ اجلاس میں اس بات کا فیصلہ کیا گیا ہے کہ اولمپکس 2028 میں شرکت کے لیے ٹیموں کی کوالیفکیشن کا طریقہ کار کیا ہوگا۔

ذرائع کے مطابق:

• ایشیا، یورپ، افریقہ اور اوشیانا سے ایک ایک بہترین رینکنگ ٹیم کوالیفائی کرے گی۔

• امریکہ کو بطور میزبان براہ راست ایونٹ میں شرکت کا حق حاصل ہوگا۔

• چھٹی اور آخری ٹیم کا انتخاب ایک کوالیفائر ٹورنامنٹ کے ذریعے ہوگا۔

کرکٹ کی اولمپکس میں شمولیت نہ صرف کھیل کی عالمی مقبولیت میں اضافہ کرے گی بلکہ وہ ممالک بھی اس کھیل میں دلچسپی لینے لگیں گے جہاں کرکٹ ابھی اتنا عام نہیں۔ یہ فیصلہ خاص طور پر امریکی مارکیٹ میں کرکٹ کے فروغ کے لیے ایک اہم سنگ میل سمجھا جا رہا ہے۔

انٹرنیشنل کرکٹ کونسل (ICC) نے اس پیشرفت کو کرکٹ کے لیے تاریخی لمحہ قرار دیا ہے۔ آئی سی سی حکام کا کہنا ہے کہ وہ دنیا بھر میں کرکٹ کے فروغ اور اسے اولمپک معیار پر لے جانے کے لیے مکمل طور پر تیار ہیں۔