پاکستان کو پہلا گولڈ میڈل دلانے والے ریسلر دین محمد انتقال کرگئے

لاہور: پاکستان کے لیے پہلا ایشین گیمز گولڈ میڈل جیتنے والے عظیم ریسلر دین محمد پہلوان 100 برس سے زائد عمر میں انتقال کر گئے۔

دین محمد نے 1954 کے منیلا ایشین گیمز میں فلپائن، بھارت اور جاپان کے ریسلرز کو شکست دے کر گولڈ میڈل حاصل کیا۔ انہوں نے کامن ویلتھ گیمز میں برونز میڈل بھی جیتا۔ اس کے علاوہ پاکستانی ریسلر نے کئی بین الاقوامی مقابلوں میں پاکستان کا پرچم بلند کیا۔

صوبائی وزیر کھیل فیصل ایوب کھوکھر اور ڈی جی اسپورٹس پنجاب خضر افضال چوہدری نے اظہارِ افسوس کرتے ہوئے کہا کہ دین محمد کی خدمات ناقابلِ فراموش ہیں۔

دین محمد کا تعلق لاہور کے نواحی علاقے باٹا پور سے تھا۔