روسی وزیر نے برطرفی کے چند گھنٹوں بعد خودکشی کر لی

روس کے وزیر برائے ٹرانسپورٹ رومان استاروویت نے اپنی برطرفی کے چند گھنٹوں بعد خودکشی کر لی۔

غیر ملکی خبررساں ایجنسی کے مطابق، روسی تحقیقاتی کمیٹی نے ان کی موت کی تصدیق کرتے ہوئے کہا کہ استاروویت جمعرات کو ماسکو ریجن میں مردہ حالت میں پائے گئے، جہاں ان کی گاڑی سے لاش ملی جس پر گولی کا زخم تھا۔

کمیٹی کی ترجمان نے بتایا کہ واقعے کی تحقیقات جاری ہیں تاکہ موت کی اصل وجوہات کا تعین کیا جا سکے، تاہم یہ امکان ہے کہ استاروویت نے خودکشی کی۔

یہ واقعہ اس وقت پیش آیا جب چند گھنٹے قبل ہی روسی صدر ولادیمیر پیوٹن نے استاروویت کو وزیر ٹرانسپورٹ کے عہدے سے برطرف کیا تھا۔

استاروویت کو مئی 2024 میں وزیر ٹرانسپورٹ تعینات کیا گیا تھا، اور اس سے قبل وہ ستمبر 2019 سے روس کے سرحدی علاقے کرسک کے گورنر کے طور پر خدمات انجام دے رہے تھے۔

روس کے سرکاری میڈیا نے یہ بھی اشارہ دیا ہے کہ اس خودکشی کا تعلق کرسک میں بدعنوانی اور دفاعی انتظامات کے لیے ملنے والے فنڈز کے غبن سے ممکنہ مقدمے سے ہو سکتا ہے۔