سپریم کورٹ نے ایل ایل بی پروگرام چار سال کرنے کا حکم دیدیا

سپریم کورٹ نے ملک بھر میں ایل ایل بی (قانون) کے تعلیمی پروگرام کا دورانیہ پانچ سال سے کم کر کے چار سال کرنے کا حکم دے دیا ہے، جبکہ بیرونِ ملک سے قانون کی تعلیم حاصل کرنے والے طلبہ کے لیے سی لاء ٹیسٹ ختم کرنے کی بھی ہدایت جاری کی گئی ہے۔

جسٹس امین الدین خان کی سربراہی میں پانچ رکنی آئینی بینچ نے لیگل ایجوکیشن ریفارمز کیس کی سماعت کے دوران یہ احکامات جاری کیے۔

سماعت کے دوران جسٹس محمد علی مظہر نے ریمارکس دیے کہ قانونی تعلیم کے معیار کو بہتر بنانے کے لیے ضروری اقدامات کیے جائیں۔ انہوں نے ایس ایم لا کالج کا حوالہ دیتے ہوئے کہا کہ اگر ادارے میں کچھ کمی ہے تو اُسے دور کریں، بند نہ کریں، یہ ادارہ تو قیام پاکستان سے پہلے کا ہے۔

سپریم کورٹ نے کیس کی مزید سماعت غیر معینہ مدت تک ملتوی کر دی ہے۔