عدالت نے اداکارہ نازش جہانگیر کو بڑا ریلیف دیدیا

لاہور کی مقامی عدالت نے اداکارہ نازش جہانگیر کے خلاف مبینہ فراڈ کیس میں جاری کیے گئے ناقابل ضمانت وارنٹ گرفتاری منسوخ کر دیے۔

لاہور کے علاقے کینٹ کی کچہری عدالت کے میجسٹریٹ غلام شبیر سیال نے گزشتہ روز اداکارہ نازش جہانگیر کے ناقابل ضمانت وارنٹ گرفتاری جاری کرتے ہوئے انہیں 22 مارچ کو گرفتار کر کے پیش کرنے کا حکم دیا تھا۔ تاہم، آج اداکارہ خود ہی اپنے وکیل بیریسٹر حارث کے ہمراہ عدالت میں پیش ہوئیں، جس پر عدالت نے ان کے وارنٹ گرفتاری منسوخ کر دیے۔

نازش جہانگیر نے 50 ہزار روپے کے ضمانتی مچلکے جمع کرائے، جس کے بعد عدالت نے ان کے وارنٹ گرفتاری کو منسوخ کر دیا۔

عدالت نے کیس کی اگلی سماعت 28 اپریل تک ملتوی کر دی۔ واضح رہے کہ نازش جہانگیر کے خلاف ساتھی اداکار اسود ہارون نے فراڈ کا مقدمہ درج کرایا تھا۔