ٹرمپ انتظامیہ نے سلامتی کونسل میں غزہ جنگ بندی کی قرارداد ویٹو کر دی

اقوام متحدہ کی سلامتی کونسل میں غزہ میں مستقل جنگ بندی اور بلا رکاوٹ امداد کی فراہمی کی قرارداد امریکا نے ویٹو کر دی۔ قرارداد الجزائر نے پاکستان سمیت 10 غیر مستقل ارکان کے تعاون سے پیش کی تھی۔

سلامتی کونسل کے 15 میں سے 14 ارکان نے قرارداد کے حق میں ووٹ دیا، مگر امریکا کے ویٹو نے قرارداد کو منظور ہونے سے روک دیا۔ پاکستان بھی حمایت کرنے والے ممالک میں شامل تھا۔

ادھر غزہ میں اسرائیلی بمباری جاری ہے، صرف 24 گھنٹوں میں مزید 45 فلسطینی شہید ہو چکے ہیں۔ امریکی امدادی تنظیم نے انتظامی مسائل کا بہانہ بنا کر امداد کی تقسیم بھی روک دی ہے، جس سے انسانی بحران مزید شدید ہو گیا ہے۔