سیکرٹری جنرل پی ٹی آئی اڈیالہ جیل میں اپنی مرتب کردہ ملاقاتی فہرست پر ڈٹ گئے

پاکستان تحریک انصاف (پی ٹی آئی) کے سیکرٹری جنرل سلمان اکرم راجہ اڈیالہ جیل کے گیٹ نمبر 5 پر اپنی مرتب کردہ ملاقاتی فہرست پر ڈٹ گئے۔

سلمان اکرم راجہ نے جیل عملے سے بات چیت کرتے ہوئے کہا کہ بابر اعوان کا نام ملاقات کی فہرست سے نکالیں کیونکہ وہ نام انہوں نے نہیں دیا تھا۔ انہوں نے کہا کہ اگر بابر اعوان کو بھیجا گیا تو وہ اسی جگہ احتجاج کریں گے۔

جیل عملے نے ان کی درخواست پر بابر اعوان کو روکنے کی یقین دہانی کرائی اور سلمان اکرم راجہ کو ملاقات کرنے کی اجازت دے دی۔ صحافی نے سوال کیا کہ بابر اعوان کا نام شامل نہ ہونے کے باوجود انہیں ملاقات کی اجازت کیسے ملی؟ جس پر سلمان اکرم راجہ نے کہا کہ ہم احتجاج کریں گے اور ڈسپلن قائم کروائیں گے۔

اس سے قبل سلمان اکرم راجہ نے جیل عملے سے کہا کہ وہ صرف وہی نام شامل کریں جو انہوں نے دیے ہیں، بشریٰ بی بی کی طرف سے سلمان صفدر اور عثمان گل کے نام شامل کرنے کی درخواست کی۔ انہوں نے مزید کہا کہ ہائی کورٹ میں اس معاملے کا فیصلہ ہو چکا ہے اور اعظم سواتی، حامد خان اور عزیز بھنڈاری کے نام بھی شامل کیے جائیں۔

یاد رہے کہ اسلام آباد ہائیکورٹ نے اڈیالہ جیل میں عمران خان اور بشریٰ بی بی کی ملاقات کیلئے منگل اور جمعرات کا دن مقرر کیا ہے۔