ٹرمپ نے کملا ہیرس اور ہیلر کلنٹن کو بڑا جھٹکا دیدیا

امریکی صدر ڈونلڈ ٹرمپ نے اپنے ڈیموکریٹک مخالفین کے خلاف ایک اور قدم اٹھاتے ہوئے سابق نائب صدر کملا ہیرس، سابق وزیر خارجہ ہیلری کلنٹن اور دیگر کی سیکیورٹی کلیئرنس واپس لے لی ہے۔

برطانوی خبر رساں ادارے کے مطابق، ریپبلکن صدر ٹرمپ نے 2016 کے صدارتی انتخابات میں ہیلری کلنٹن اور گزشتہ سال کے انتخابات میں کملا ہیرس کو شکست دی تھی، اور اب انہوں نے سابق صدر جو بائیڈن کی سیکیورٹی کلیئرنس بھی منسوخ کر دی ہے۔ ٹرمپ نے ایک یادداشت میں کہا کہ کچھ افراد کیلئے خفیہ معلومات تک رسائی اب ضروری نہیں ہے۔

اگرچہ سیکیورٹی کلیئرنس کی منسوخی کے فوری اثرات نہیں ہوں گے، مگر یہ واشنگٹن میں بڑھتی ہوئی سیاسی کشیدگی کا مزید اظہار ہے، کیونکہ ٹرمپ اپنے مخالفین سے بدلہ لینے کی کوشش کر رہے ہیں۔

یہ میمورنڈم صدر ٹرمپ کے نیو جرسی کے علاقے بیڈمنسٹر پہنچنے کے چند گھنٹوں بعد جاری کیا گیا۔ اس کے علاوہ، ٹرمپ نے ریپبلکن پارٹی کی سابق نمائندہ لز چینی، جو بائیڈن کے وائٹ ہاؤس کے سابق قومی سلامتی کے مشیر جیک سلیون، روس کی ماہر فیونا ہل اور دیگر افراد کی سیکیورٹی کلیئرنس بھی منسوخ کر دی ہے، جنہوں نے ان کی پہلی مدت کے دوران قومی سلامتی کونسل میں خدمات انجام دی تھیں۔