اقوام متحدہ کی سلامتی کونسل میں امریکا نے چھٹی بار غزہ جنگ بندی کی قرارداد ویٹو کردی ہے۔ امریکی میڈیا کے مطابق، امریکا نے اس قرارداد کو ویٹو کیا جبکہ سلامتی کونسل کے 14 ارکان نے اس کی حمایت کی۔
قرار داد میں غزہ میں فوری، غیر مشروط اور مستقل جنگ بندی کا مطالبہ کیا گیا تھا۔ اس کے ساتھ ساتھ اسرائیل سے کہا گیا تھا کہ وہ فلسطینی علاقوں میں امدادی سامان کی فراہمی پر لگائی گئی پابندیاں ختم کرے۔
یہ قرارداد سلامتی کونسل کے 15 ارکان میں سے 10 غیر مستقل رکن ممالک نے پیش کی تھی، جن میں پاکستان بھی شامل تھا۔
امریکی ویٹو ایسے وقت آیا ہے جب غزہ میں انسانی بحران شدت اختیار کر چکا ہے اور عالمی سطح پر جنگ بندی کے لیے دباؤ بڑھ رہا ہے۔
امریکا کے اس ویٹو کے بعد کئی ممالک نے اس پر مایوسی کا اظہار کیا ہے اور عالمی برادری نے جنگ بندی کے لیے زور دینا جاری رکھا ہوا ہے۔
