پاکستان منرلز انویسٹمنٹ فورم کل سے اسلام آباد میں آغاز ہوگا!

اسلام آباد: دو روزہ پاکستان منرلز انویسٹمنٹ فورم کل (منگل) سے اسلام آباد میں شروع ہونے جا رہا ہے، جس میں ملکی و غیر ملکی سرکاری حکام، سرمایہ کار اور ماہرین معدنیات کی بڑی تعداد شرکت کرے گی۔

وزیراعظم شہباز شریف اور آرمی چیف جنرل سید عاصم منیر فورم میں خصوصی طور پر شرکت کریں گے اور خطاب بھی کریں گے۔ ان کی شرکت اس بات کی علامت ہے کہ حکومت پاکستان معدنی وسائل کے فروغ اور غیر ملکی سرمایہ کاروں کے اعتماد کو بڑھانے کے لیے پرعزم ہے۔

فورم میں امریکہ کے اعلیٰ سطحی وفد کی شرکت متوقع ہے، جس کی قیادت ایرک مائر کر رہے ہیں۔ اس کے علاوہ وفاقی وزراء، سیکریٹریز اور ملک و بیرون ملک سے صنعتکار و سرمایہ کار بھی شرکت کریں گے۔

غیر ملکی شرکت کو مزید تقویت دینے کے لیے ایشیائی ترقیاتی بینک (ADB) کی ڈپٹی ڈائریکٹر جنرل کیتھرین مارش اور چین کے شیان جیولوجیکل سروے سینٹر کے وفد نے اسلام آباد پہنچ کر اپنی شرکت کی تصدیق کر دی ہے۔

دو روزہ فورم میں شرکاء پاکستان میں معدنی شعبے میں سرمایہ کاری کے مواقع، خاص طور پر ریکوڈک منصوبے پر خصوصی توجہ مرکوز کریں گے۔ اس کے ساتھ ساتھ حکومت کی وہ پالیسیاں اور اقدامات بھی زیر بحث آئیں گے جو اس شعبے میں ترقی کے فروغ کے لیے اپنائے جا رہے ہیں۔

مختلف شعبوں سے تعلق رکھنے والے ماہرین معدنی وسائل کی ترقی، جدید ٹیکنالوجی کے استعمال، پائیدار حکمت عملی اور عالمی شراکت داری کے حوالے سے اپنی تجاویز اور تجربات پیش کریں گے۔