سپریم کورٹ نے سینیٹر اعجاز چوہدری کی ضمانت منظور کر لی

اسلام آباد: سپریم کورٹ نے پی ٹی آئی رہنما و سینیٹر اعجاز چوہدری کی ضمانت منظور کرتے ہوئے ایک لاکھ روپے کے مچلکے ٹرائل کورٹ میں جمع کرانے کا حکم دے دیا۔

جسٹس نعیم اختر افغان کی سربراہی میں تین رکنی بینچ نے سماعت کی۔ پراسیکیوشن نے مؤقف اختیار کیا کہ اعجاز چوہدری نے عوام کو اکسایا اور سازش میں شریک رہے۔ جسٹس نعیم نے ریمارکس دیے کہ اگر کیس اتنا مضبوط تھا تو ملٹری کورٹ میں بھیجا جاتا، ضمانت کو سزا کے طور پر استعمال نہیں کیا جا سکتا۔

وکیلِ صفائی نے بتایا کہ اعجاز چوہدری 11 مئی 2023 سے زیرِ حراست ہیں۔

یاد رہے کہ فروری 2024 میں لاہور کی انسداد دہشتگردی عدالت نے 9 مئی کے پرتشدد واقعات میں یاسمین راشد، محمود الرشید اور اعجاز چوہدری پر فردِ جرم عائد کی تھی، جس میں ملزمان نے صحتِ جرم سے انکار کیا۔ ٹرائل جیل میں جاری ہے۔