گاڑی بیچنے والوں کے لیے خوشخبری، اب بایومیٹرک کے بغیر منتقلی ممکن

سندھ ایکسائز اینڈ ٹیکسیشن ڈیپارٹمنٹ نے گاڑیوں کی ملکیت کی منتقلی کے لیے بایومیٹرک تصدیق کی شرط میں دو ماہ کی عارضی نرمی کا اعلان کیا ہے۔ جاری کردہ نوٹیفکیشن کے مطابق، اب 14 اگست 2025 تک گاڑی کی منتقلی صرف فروخت کنندہ کے شناختی کارڈ (CNIC) کی بنیاد پر کی جا سکے گی۔

ترجمان ایکسائز کے مطابق، اس اقدام کا مقصد عوام کی سہولت اور دستاویزی عمل میں آسانی فراہم کرنا ہے۔ اُن کا کہنا تھا کہ "یہ وقتی رعایت اُن علاقوں کے لیے مفید ہو گی جہاں بایومیٹرک سہولیات محدود یا غیر فعال ہیں۔”

دوسری جانب کراچی میں غیر معیاری یا فینسی نمبر پلیٹس کے خلاف ٹریفک پولیس نے سخت کارروائی کا آغاز کر دیا ہے۔ متعدد موٹرسائیکلیں ضبط کر لی گئی ہیں، اور شہر کے مختلف تھانوں کے احاطے ان گاڑیوں سے بھر چکے ہیں۔

ڈی آئی جی ٹریفک پیر محمد شاہ نے کہا کہ صرف واضح، حکومت سے منظور شدہ نمبر پلیٹس ہی قابل قبول ہوں گی۔ “نمبر پلیٹس اگر غیر واضح، فینسی یا غیر معیاری ہوئیں تو گاڑیاں ضبط کی جائیں گی۔ یہ آپریشن ای-چالان نظام کے پہلے مرحلے کا حصہ ہے جو آئندہ ماہ سے مکمل طور پر نافذ کر دیا جائے گا۔”

حکام کے مطابق جولائی 2025 سے کراچی میں ای-چالان سسٹم کے تحت کیمروں کی مدد سے ٹریفک قوانین کی خلاف ورزیوں پر خودکار جرمانے جاری کیے جائیں گے، جس سے نگرانی اور قانون نافذ کرنے کے عمل کو مزید بہتر بنایا جائے گا۔