جیف بیزوس اور لورین سانچیز کی مہنگی ترین شادی کی تقریبات اٹلی میں جاری

اٹلی: ایمازون کے بانی جیف بیزوس اور صحافی لورین سانچیز کی تین روزہ پُرتعیش شادی کی تقریبات اٹلی کے شہر وینس میں جاری ہیں، جنہیں دنیا کی مہنگی ترین شادیوں میں شمار کیا جا رہا ہے۔

شادی کی تقریب وینس کے تاریخی مقام "آرسنل” میں منعقد کی جا رہی ہے، تاہم باضابطہ تاریخ اور مقام کو تاحال خفیہ رکھا گیا ہے۔ بعض رپورٹس کے مطابق یہ جوڑا پہلے ہی امریکا میں نجی طور پر شادی کر چکا ہے۔

شادی کا تخمینہ 56 ملین ڈالر (15 ارب روپے سے زائد) لگایا گیا ہے۔ تقریب میں ہالی وڈ اسٹارز اور دنیا بھر کی 250 نمایاں شخصیات کی شرکت متوقع ہے، جن میں ایوانکا ٹرمپ بھی شامل ہیں۔

مہمانوں کو لانے کے لیے 90 پرائیویٹ جیٹس اور 30 واٹر ٹیکسیاں مختص کی گئی ہیں۔ شرکت کرنے والے افراد کو وینس کے 5 پرتعیش ہوٹلز میں ٹھہرایا گیا ہے۔

شادی میں اٹلی کے روایتی ذائقے شامل کرنے کے لیے مقامی دکانداروں کو معروف "روزا سلوا پیسٹری” کے 200 خصوصی بیگز تیار کرنے کا آرڈر دیا گیا ہے۔

بیزوس اور لورین نے 2023 میں منگنی کی تھی۔ بیزوس نے 2019 میں اپنی 26 سالہ شادی ختم کی تھی جبکہ لورین بھی 13 سالہ ازدواجی زندگی کے بعد طلاق لے چکی ہیں۔