ایران کا مؤقف: خلیجی علاقوں میں حملوں کے پیچھے امریکا ہے

ایران نے خلیجی ممالک کے شہری علاقوں کے قریب ہونے والے حالیہ حملوں کا ذمہ دار امریکا کو قرار دیا ہے۔ ایرانی وزیر خارجہ عباس عراقچی کے مطابق ان واقعات نے خطے میں بے چینی پیدا کی ہے اور عام شہری بھی متاثر ہو رہے ہیں، جبکہ خلیجی حملوں کی ذمہ داری امریکا پر عائد ہوتی ہے۔

عرب میڈیا کو دیے گئے انٹرویو میں عباس عراقچی نے کہا کہ امریکی افواج نے اپنے روایتی فوجی اڈوں کے بجائے شہری علاقوں اور ہوٹلوں میں منتقل ہونا شروع کر دیا ہے۔ ان کے مطابق اس تبدیلی کی وجہ سے ایسے مقامات بھی نشانے پر آئے جو آبادی کے قریب واقع ہیں۔

انہوں نے مزید کہا کہ جہاں جہاں امریکی افواج یا ان کی تنصیبات موجود تھیں، ایران نے انہیں نشانہ بنایا۔ تاہم انہوں نے یہ بھی تسلیم کیا کہ کچھ مقامات شہری علاقوں کے قریب ہو سکتے ہیں جس سے عام لوگوں کے متاثر ہونے کا خطرہ بڑھ گیا۔

یہ بھی پڑھیں: لبنان کے دارالحکومت بیروت میں اسرائیلی بمباری، 6 افراد ہلاک

ایرانی وزیر خارجہ کا کہنا تھا کہ ان حملوں کے باعث خلیجی ممالک اور وہاں کے عوام کو مشکلات اور پریشانی کا سامنا کرنا پڑا ہے۔ انہوں نے زور دیا کہ شہری علاقوں میں فوجی سرگرمیوں کی موجودگی خطے کے امن کے لیے خطرہ بن رہی ہے۔

عباس عراقچی نے آخر میں کہا کہ 28 فروری کو شروع ہونے والی کشیدگی کی مکمل ذمہ داری امریکا پر عائد ہوتی ہے۔ انہوں نے دوبارہ واضح کیا کہ خلیجی حملوں کی ذمہ داری امریکا ہے، خاص طور پر ان حملوں میں جو شہری علاقوں کے قریب ہوئے اور جن سے خطے کے امن و استحکام پر منفی اثر پڑا۔