چیمپئنز ٹرافی کو یادگار ایونٹ بنانے کے لیے تیار ہیں، چیئرمین پی سی بی

پاکستان کرکٹ بورڈ کے چیئرمین محسن نقوی نے کہا ہے کہ ہم آئی سی سی چیمپئنز ٹرافی کو ایک یادگار ایونٹ بنانے کے لیے مکمل طور پر تیار ہیں۔

آج صبح چیئرمین پی سی بی محسن نقوی نے لاہور کے قذافی اسٹیڈیم کا اچانک دورہ کیا اور وہاں جاری تعمیراتی کاموں کا جائزہ لیا۔

محسن نقوی نے اس موقع پر مین بلڈنگ کے فنشنگ کاموں کا معائنہ کیا اور فنشنگ کے ساتھ ساتھ ڈرینج کے کام کو ہر صورت جلد اور مقررہ وقت میں مکمل کرنے کی ہدایت کی۔

چیئرمین پی سی بی نے پراجیکٹ پر ہونے والی پیش رفت پر اطمینان کا اظہار کرتے ہوئے کہا کہ قذافی اسٹیڈیم میں نئی اسکور اسکرینز کی تنصیب کا کام بھی جاری ہے اور اسٹیڈیم جدید سہولتوں سے آراستہ ہو گا۔ انہوں نے کہا کہ قذافی اسٹیڈیم رواں ماہ مکمل ہو جائے گا۔

انہوں نے مزید کہا کہ چیمپئنز ٹرافی ٹورنامنٹ کے لیے اسٹیڈیم کی تعمیر نو کا کام تیزی سے جاری ہے، جس میں شائقین کرکٹ کے لیے نئی کرسیاں اور ایل ای ڈی لائٹس نصب کی جا رہی ہیں۔ اس کے علاوہ اسٹیڈیم میں آنے والے میچوں کے دوران لیزر لائٹ شو کا بھی اہتمام کیا جائے گا تاکہ شائقین کا تجربہ مزید خوشگوار ہو۔

واضح رہے کہ پاکستان 29 سال بعد کسی آئی سی سی ایونٹ کی میزبانی کر رہا ہے۔ چیمپئنز ٹرافی 19 فروری سے 9 مارچ تک شیڈول ہے اور پاکستان نہ صرف اس ٹورنامنٹ کا میزبان ہے بلکہ اس کا دفاعی چیمپئن بھی ہے۔