فتح 4 کروز میزائل کا کامیاب تجربہ، پاکستان کی دفاعی صلاحیت میں اضافہ

پاکستان نے مقامی سطح پر تیار کردہ فتح 4 گراؤنڈ لانچڈ کروز میزائل کا کامیاب تجربہ کر لیا ہے، جس سے ملک کی دفاعی صلاحیت میں نمایاں اضافہ ہوا ہے۔

پاک فوج کے شعبہ تعلقات عامہ انٹر سروسز پبلک ریلیشنز کے مطابق یہ میزائل جدید ترین نیویگیشنل معاون نظام سے لیس ہے، جو اسے ہدف تک انتہائی درستگی کے ساتھ پہنچنے میں مدد فراہم کرتا ہے۔

آئی ایس پی آر کے بیان کے مطابق فتح 4 طویل فاصلے تک اہداف کو کامیابی سے نشانہ بنانے کی صلاحیت رکھتا ہے اور جدید ٹیکنالوجی سے مزین ہے، جو اسے جدید جنگی تقاضوں کے مطابق بناتی ہے۔

میزائل کے اس کامیاب تجربے کا مشاہدہ پاک فوج کی آرمی راکٹ فورس کمانڈ کے سینئر افسران نے کیا، جنہوں نے اس کامیابی کو اہم سنگِ میل قرار دیا۔

پاکستان کا مقامی طور پر تیار کردہ فتح -4 کروز میزائل کا کامیاب تربیتی فائر کا مظاہرہ۔
تربیتی فائر کا مظاہرہ آرمی راکٹ کمانڈ فورس نے کیا
صدر مملکت ، وزیراعظم ، چیف آف ڈیفنس فورسز اور سروسز چیفس کی پوری ٹیم کو کامیاب تربیتی فائر مظاہرے پر مبارکباد pic.twitter.com/BoQTwoAoTK

— PTV News (@PTVNewsOfficial) May 14, 2026

آئی ایس پی آر کے مطابق صدر مملکت، وزیر اعظم، چیف آف ڈیفنس فورسز اور پاک فضائیہ و بحریہ کے سربراہان نے فتح 4 کے کامیاب تجربے پر سائنسدانوں اور انجینئرز کی کاوشوں کو سراہا۔

ماہرین کے مطابق اس جدید میزائل کی تیاری پاکستان کے دفاعی نظام کو مزید مضبوط بنانے اور خطے میں توازن برقرار رکھنے میں اہم کردار ادا کرے گی۔