پاکستانی حکومت اور عوام ترکیہ کے ہوٹل میں آگ لگنے کے واقعہ پر غمزدہ ہیں، ترجمان دفتر خارجہ

اسلام آباد: ترجمان دفتر خارجہ شفقت علی خان نے کہا ہے کہ پاکستانی حکومت اور عوام آج صبح ترکیہ کے ہوٹل میں آگ لگنے کے واقعہ پر غمزدہ ہیں۔ جس میں 66 افراد جان کی بازی ہار گئے جبکہ 51 زخمی ہیں۔
اپنے ایک بیان میں ترجمان دفتر خارجہ نے کہا کہ پاکستان ترکیہ کی حکومت اور عوام سے دکھ کا اظہار کرتا ہے۔ہماری ہمدردیاں اور دعائیں متاثرہ خاندانوں کے ساتھ ہیں جن کے پیارے اس دنیا سے چلے گئے۔ دکھ کی اس گھڑی میں پاکستان ترکیہ کے بہن بھائیوں کے ساتھ کھڑا ہے ۔
ترکیہ کے وزیر داخلہ نے سوشل میڈیا پلیٹ فارم ایکس پر بتایا کہ یہ حادثہ 12 منزلہ ہوٹل میں پیش آیا، جس کی دیواریں لکڑی سے بنی ہوئی تھیں۔ آگ کا آغاز مقامی وقت کے مطابق رات 3:27 بجے ہوا۔ جو تیزی سے پھیل گئی۔ تاہم، آگ لگنے کی اصل وجہ فوری طور پر معلوم نہیں ہوسکی۔
مقامی میڈیا کے مطابق تین افراد نے ہوٹل کی کھڑکیوں سے چھلانگ لگانے کے بعد اپنی جانیں گنوا دیں۔ہوٹل کا ایک حصہ ایک کھڑی چٹان کے ساتھ ہونے کی وجہ سے فائر فائٹرز کو آگ پر قابو پانے میں مشکلات کا سامنا کرنا پڑا۔
مقامی میڈیا کے مطابق، ہوٹل میں 237 افراد مقیم تھے، جہاں اسکول کی چھٹیوں کے باعث 80 سے 90 فیصد تک کمرے بھرے ہوئے تھے۔محفوظ طور پر نکالے گئے افراد کو قریبی ہوٹلوں میں منتقل کر دیا گیا ہے۔
وزیر انصاف نے بتایا کہ آگ کی وجوہات جاننے کے لیے چھ پراسیکیوٹرز کو تعینات کیا گیا ہے۔وزیر صحت، وزیر داخلہ اور وزیر ثقافت کے بھی جائے حادثہ کا دورہ کرنے کی توقع ہے۔