بھارتی جارحیت کا منہ توڑ جواب، وزیراعظم کا آج یوم تشکر منانے کا اعلان

وزیراعظم شہباز شریف نے بھارتی جارحیت کا منہ توڑ جواب دینے اور آپریشن بنیان المرصوص کی کامیابی پر آج (اتوار) ملک بھر میں یوم تشکر منانے کا اعلان کیا ہے۔

وزیراعظم کا کہنا تھا کہ یہ دن اللہ تعالیٰ کے حضور سجدہ شکر بجا لانے، افواج پاکستان کی شجاعت کو خراج تحسین پیش کرنے اور قومی اتحاد و حوصلے کو سراہنے کے لیے منایا جا رہا ہے۔ انہوں نے کہا کہ آپریشن بنیان المرصوص نے دشمن کی جارحیت کا مؤثر اور بھرپور جواب دیا اور پاکستان نے ہر محاذ پر اپنی برتری کو ثابت کیا۔

وزیراعظم کے مطابق، پاکستان نے دشمن کی اشتعال انگیزی کے باوجود صبر و تحمل کا مظاہرہ کیا، تاہم ملکی دفاع کو یقینی بنانے کے لیے مکمل تیاری کے ساتھ ہر ممکن اقدام اٹھایا گیا۔

انہوں نے قوم سے اپیل کی کہ وہ یوم تشکر کے موقع پر خاص طور پر اجتماعی دعاؤں، نوافل اور اللہ کے حضور شکرگزاری کا اہتمام کریں۔ وزیراعظم نے علمائے کرام سے بھی درخواست کی کہ وہ شہداء اور غازیوں کے لیے خصوصی دعائیں کریں۔

وزیراعظم نے کہا کہ افواج پاکستان کی قربانیاں ناقابلِ فراموش ہیں اور پوری قوم اپنے محافظوں کے ساتھ مضبوطی سے کھڑی ہے۔