معروف بھارتی کرکٹر پر لاکھوں روپے کا بھاری جرمانہ

انڈین پریمیئر لیگ (آئی پی ایل) 2025 کے ایک اہم میچ میں گجرات ٹائٹنز کے کپتان شبمن گل پر سلو اوور ریٹ کی خلاف ورزی پر 12 لاکھ روپے جرمانہ عائد کر دیا گیا ہے۔

یہ واقعہ دہلی کیپیٹلز کے خلاف میچ کے دوران پیش آیا، جس میں گجرات نے 7 وکٹوں سے کامیابی حاصل کی۔ اگرچہ ٹیم نے میچ جیت لیا، لیکن وہ مقررہ وقت میں اوور مکمل کرنے میں ناکام رہی، جس کی وجہ سے آرٹیکل 2.22 کے تحت شبمن گل پر جرمانہ عائد کیا گیا۔ یہ ان کا سیزن کا پہلا ایسا جرم تھا، اس لیے کم سے کم سزا دی گئی۔

میچ کے آخری اوور میں ٹیم کو سرکل سے باہر 4 فیلڈرز رکھنے کی اجازت دی گئی، جو سلو اوور ریٹ کا واضح اشارہ تھا۔

اس فتح کے بعد گجرات ٹائٹنز رن ریٹ کی بنیاد پر پوائنٹس ٹیبل میں پہلی پوزیشن پر آ گئی ہے، حالانکہ دہلی کیپیٹلز اور پنجاب کنگز کے پوائنٹس بھی 10 ہیں۔

یاد رہے کہ اس سے قبل لکھنؤ سپر جائنٹس کے کپتان رشبھ پنت پر بھی سلو اوور ریٹ کی خلاف ورزی پر 12 لاکھ روپے جرمانہ عائد کیا جا چکا ہے۔