"ڈپریشن کے وقت صرف نماز کافی نہیں”: عینا آصف

معروف اداکارہ عینا آصف حال ہی میں ایک مارننگ شو میں ذہنی صحت سے متعلق گفتگو کے بعد تنازعے کا شکار ہوگئیں۔ پروگرام میں ان کے ہمراہ اداکار ابوالحسن بھی موجود تھے، اور دونوں اپنی نئی ڈرامہ سیریل "پرورش” کی پروموشن کے لیے شریک ہوئے تھے۔

گفتگو کے دوران عینا آصف نے کہا کہ صرف مذہبی عبادات سے ہر بار ڈپریشن کا علاج ممکن نہیں ہوتا۔ انہوں نے کہا:

"کبھی کبھار تھراپسٹس بہت سخت ہوتے ہیں۔ آپ کا بچہ مدد کے لیے جائے گا، اور وہ کہیں گے ‘نماز پڑھو’ — ہاں، نماز بہت اہم ہے — لیکن اس لمحے میں جب میں ڈپریشن میں ہوں، میں کیا کروں؟”

ان کے ساتھی ابوالحسن نے ان کی رائے کی تائید کرتے ہوئے کہا:

"ہمیں علاج کے لیے تھراپسٹس کی ضرورت ہے۔ ہر مسئلے کا حل صرف نماز پر چھوڑ دینا درست نہیں۔ اللہ تعالیٰ نے ہمیں عقل دی ہے، تاکہ ہم اس سے فائدہ اٹھا کر طبی مدد حاصل کریں۔”