ہربھجن سنگھ کے جوفرا آرچر کیخلاف نسلی ریمارکس پر تنازع کھڑا ہوگیا

آئی پی ایل 2025 کے میچ میں کمنٹری کے دوران ہربھجن سنگھ نے جوفرا آرچر کے بارے میں نسلی تعصب پر مبنی الفاظ استعمال کیے اور کہا کہ "کالی ٹیکسی کا میٹر تیز بھاگتا ہے اور یہاں پر آرچر صاحب کا میٹر بھی تیز بھاگا ہے۔”

سوشل میڈیا پر صارفین نے ہربھجن سنگھ سے فوری طور پر معافی کا مطالبہ کیا۔ ایک صارف نے لکھا، "ہربھجن سنگھ نے جوفرا آرچر کو سیاہ ٹیکسی ڈرائیور کہا، یہ گھٹیا اور نفرت انگیز ہے۔” دوسرے صارفین نے بھی سخت الفاظ میں مذمت کی اور ہربھجن کو شرم کا طعنہ دیا۔

واضح رہے کہ ہربھجن سنگھ ماضی میں بھی نسلی تبصروں کی وجہ سے تنقید کا سامنا کرچکے ہیں، لیکن ابھی تک انہوں نے اس تنازع پر کوئی ردعمل نہیں دیا۔