کم سے کم اجرت 37 ہزار نہ دینے والوں کی گرفتاریاں

اسلام آباد: وفاقی حکومت کی جانب سے مالی سال 25-2024 کے بجٹ میں مقرر کردہ کم از کم ماہانہ اجرت 37 ہزار روپے پر عملدرآمد یقینی بنانے کیلئے اسلام آباد کی ضلعی انتظامیہ نے کارروائیاں تیز کر دی ہیں۔

اسسٹنٹ کمشنر رورل فہد شبیر نے غوری ٹاؤن کے ایک ریسٹورنٹ پر چھاپہ مارا جہاں ملازمین کو مقررہ تنخواہ نہیں دی جا رہی تھی، جس پر منیجر کو گرفتار کر لیا گیا۔ اسی طرح بلیو ایریا میں ایک نجی سیکیورٹی کمپنی کے منیجر کو بھی کم اجرت دینے پر حراست میں لے لیا گیا۔

ڈپٹی کمشنر نے تمام اسسٹنٹ کمشنرز کو ہدایت کی ہے کہ کم از کم اجرت کے قانون پر سختی سے عملدرآمد کرایا جائے اور خلاف ورزی کرنے والے اداروں کے خلاف کارروائی جاری رکھی جائے۔