پاک بھارت کشیدگی اسٹاک مارکیٹ کو لے ڈوبی

پاکستان اسٹاک مارکیٹ میں اس وقت شدید مندی کا رجحان ہے، جہاں 100 انڈیکس ایک لاکھ 12 ہزار پوائنٹس کی سطح سے نیچے گر گیا۔

تفصیلات کے مطابق پاک بھارت کشیدگی کے باعث مارکیٹ شدید دباؤ کا شکار ہوئی۔ کاروباری ہفتے کے تیسرے روز 100 انڈیکس میں 3445 پوائنٹس کی کمی دیکھنے کو ملی، جس کے بعد انڈیکس 111,427 پوائنٹس پر ٹریڈ کر رہا ہے۔

اسٹاک ماہرین کے مطابق، مارکیٹ میں لیوریج 60 ارب روپے سے زائد تک پہنچ چکا ہے اور بروکرز نے بڑے پیمانے پر ادھار پر شیئرز خرید رکھے ہیں۔ آج ادھار کی ادائیگی کا آخری دن ہونے کی وجہ سے مارکیٹ میں مزید مندی کا سامنا ہے۔

گزشتہ روز، پاکستان اسٹاک ایکسچینج میں کاروبار کا آغاز مندی سے ہوا تھا، لیکن اختتام مثبت زون میں ہوا۔ دوسرے دن انڈیکس میں 808 پوائنٹس کا اضافہ ہوا تھا اور کاروبار 1 لاکھ 14 ہزار 872 پوائنٹس پر بند ہوا۔