اپنی زمین اپنا گھر اسکیم: مفت پلاٹس کیلئے اہلیت اور درخواست کا طریقہ کار

لاہور: وزیراعلیٰ پنجاب مریم نواز نے کم آمدنی والے شہریوں کیلئے "اپنی زمین اپنا گھر” پروگرام کے تحت ای-پورٹل کا افتتاح کر دیا ہے، جس کے ذریعے مستحق افراد کو تین مرلہ کے مفت رہائشی پلاٹ دیے جائیں گے۔

پہلے مرحلے میں صوبے کے 19 اضلاع میں 23 اسکیموں کے تحت 2,000 پلاٹ تقسیم کیے جائیں گے۔

صرف مستقل رہائشی (شناختی کارڈ کے ذریعے تصدیق شدہ) افراد اہل ہوں گے۔ درخواست صرف اپنے ضلع کی اسکیم کیلئے دی جا سکتی ہے۔ درخواست دہندہ، اس کا شریکِ حیات یا زیر کفالت بچے ملک میں کسی اور پلاٹ یا مکان کے مالک نہ ہوں۔

درخواست دہندہ کا مجرمانہ ریکارڈ اور بینک نادہندگی نہ ہو۔ غلط معلومات پر نااہلی کے ساتھ پلاٹ واپس لے لیا جائے گا۔

شرائط برائے پلاٹ الاٹمنٹ:

چھ ماہ میں تعمیر کا آغاز اور دو سال میں مکمل کرنا لازم ہوگا۔ پلاٹ 5 سال تک بیچا، منتقل یا کرایہ پر نہیں دیا جا سکتا۔ خلاف ورزی کی صورت میں پلاٹ منسوخ کر کے واپس لے لیا جائے گا۔ پلاٹ صرف رہائشی استعمال کے لیے ہوگا، تجارتی سرگرمیوں پر پابندی ہوگی۔ تعمیر کے دوران پی ایچ اے ٹی اے کسی بھی وقت معائنہ کر سکتا ہے۔

پلاٹوں کی تقسیم کی تفصیل:

راولپنڈی ڈویژن: 658 پلاٹ، 5 اسکیمیں

فیصل آباد ڈویژن: 288 پلاٹ، 4 اسکیمیں

لاہور ریجن: 518 پلاٹ، 3 اضلاع

بھکر ریجن: 131 پلاٹ، 7 اسکیمیں

ملتان ریجن: 270 پلاٹ، 5 اضلاع

بہاولپور ریجن: 27 پلاٹ، 3 اسکیمیں

وزیراعلیٰ کا کہنا تھا کہ پنجاب کے ہر شہری کو گھر کا حق حاصل ہے اور حکومت کی ذمہ داری ہے کہ مستحق افراد کو وسائل فراہم کرے۔