ایپل کا اسمارٹ گلاسز پر کام جاری

معروف امریکی ٹیکنالوجی کمپنی ایپل، جو آئی فونز اور دیگر ڈیوائسز کی تیاری کے لیے مشہور ہے، اب اسمارٹ گلاسز (جدید چشمے) اور اے آئی سرورز کے لیے خصوصی چِپس تیار کرنے میں مصروف ہے۔ ان چپس میں نئے میک بک کمپیوٹرز بھی شامل کیے جا رہے ہیں۔

ذرائع کے مطابق، ایپل نے اسمارٹ گلاسز کے لیے بنائی جانے والی چپ پر خاصی پیش رفت حاصل کر لی ہے، جو اس بات کا اشارہ ہے کہ کمپنی اب میٹا کے رے بین اسمارٹ گلاسز کا مقابلہ کرنے کے لیے سنجیدہ اقدامات کر رہی ہے۔

رپورٹ میں بتایا گیا ہے کہ ایپل ایسی کم توانائی استعمال کرنے والی چپس تیار کر رہی ہے جو اس کے اسمارٹ گلاسز کو طاقت فراہم کریں گی۔ یہ چِپ ایپل واچ میں استعمال ہونے والی چپ پر مبنی ہوگی، جس کا مطلب ہے کہ یہ دیگر ایپل ڈیوائسز جیسے آئی فون یا میک کے مقابلے میں بہت کم بجلی استعمال کرے گی۔

پروڈکشن کب شروع ہوگی؟
ایپل کے اندرونی ذرائع کا کہنا ہے کہ اسمارٹ گلاسز کی تیاری پر کام اب تیز ہو چکا ہے، اور امکان ظاہر کیا جا رہا ہے کہ 2027 کے آخر تک ان جدید چشموں کی پروڈکشن شروع ہو جائے گی۔ یعنی یہ نئی ڈیوائس تقریباً دو سال بعد صارفین کے لیے دستیاب ہو سکتی ہے۔

اسمارٹ گلاسز کیسے کام کریں گے؟
یہ جدید چشمے عام چشموں کی طرح پہنے جائیں گے لیکن ان میں جدید ٹیکنالوجی نصب ہوگی۔ یہ چشمے موبائل فون، انٹرنیٹ، اور دیگر ڈیوائسز سے منسلک ہو سکیں گے، نوٹیفکیشنز، موسم، راستے جیسی معلومات دکھا سکیں گے۔

اس کے علاوہ ان میں کیمرہ بھی ہوگا جس سے تصاویر اور ویڈیوز بنائی جا سکیں گی، جبکہ انہیں آواز یا حرکت سے کنٹرول کیا جا سکے گا۔