بھارتی فوجی کیمپ میں خوفناک آگ، فوجی جان بچا کر بھاگ نکلے

بھارتی فوجی کیمپ میں اچانک شدید آگ بھڑک اٹھی، جس کے باعث کیمپ میں شدید افراتفری پھیل گئی۔ واقعہ ڈگری کالج کے قریب پیش آیا، جہاں آگ نے دیکھتے ہی دیکھتے کیمپ کے بڑے حصے کو اپنی لپیٹ میں لے لیا۔

مقامی ذرائع کے مطابق آگ لگنے کے بعد بھارتی فوجی اہلکار اپنا ساز و سامان چھوڑ کر کیمپ خالی کرنے پر مجبور ہو گئے۔ دھوئیں کے گھنے بادل کئی کلومیٹر دور سے دیکھے جا سکتے تھے۔ امدادی ٹیمیں فوری طور پر موقع پر پہنچ گئیں اور فائر بریگیڈ عملے نے آگ بجھانے کے لیے کارروائی شروع کی۔

ابتدائی اطلاعات کے مطابق واقعے میں کوئی جانی نقصان نہیں ہوا، تاہم کیمپ کے متعدد حصے متاثر ہوئے ہیں۔ بھارتی میڈیا کے مطابق فوجی حکام تاحال آگ لگنے کی اصل وجہ جاننے میں کامیاب نہیں ہو سکے۔

واقعے نے نہ صرف بھارتی فوج کی تیاریوں بلکہ اس کے حفاظتی اقدامات پر بھی سوالات اٹھا دیے ہیں۔ سوشل میڈیا پر صارفین کی جانب سے اس واقعے پر طنزیہ تبصرے کیے جا رہے ہیں، جبکہ بعض حلقوں نے اس واقعے کو فوجی انتظامیہ کی غفلت قرار دیا ہے۔