بھارتی فوج نے پاک فضائیہ کے ہاتھوں طیارے تباہ ہونے کی تصدیق کر دی

بھارتی چیف آف ڈیفنس اسٹاف جنرل انیل چوہان نے پہلی بار حالیہ جھڑپوں میں پاک فضائیہ کے ہاتھوں لڑاکا طیاروں کی تباہی کی تصدیق کر دی۔

امریکی جریدے بلوم برگ کو انٹرویو میں انہوں نے تسلیم کیا کہ پاکستان کے ساتھ جھڑپوں میں بھارت نے طیارے کھوئے۔ چھ بھارتی طیاروں کی تباہی سے متعلق سوال پر انہوں نے تعداد بتانے سے گریز کرتے ہوئے کہا کہ "اصل سوال یہ ہے کہ ہمارے طیارے گرے کیوں؟” ان کے بقول جھڑپوں کے دوران تکنیکی غلطیاں ہوئیں جنہیں بعد میں درست کیا گیا۔

یاد رہے کہ بھارت نے پہلگام حملے کو جواز بنا کر پہلے سندھ طاس معاہدہ معطل کیا، پھر 6 اور 7 مئی کی درمیانی شب پاکستان اور آزاد کشمیر پر میزائل حملے کیے، جن کا پاک فوج نے بھرپور جواب دیا۔

جوابی کارروائی میں پاکستان نے "آپریشن بنیان مرصوص” کے تحت بھارت کے چھ لڑاکا طیارے (جن میں تین رافیل بھی شامل تھے) مار گرائے اور کئی بھارتی ایئر بیسز و گولہ بارود کے ذخائر تباہ کیے۔

بھارت کو بھاری نقصان کے بعد امریکا اور اتحادیوں سے جنگ بندی کی درخواست کرنا پڑی، جس کے نتیجے میں دونوں ممالک کے درمیان سیز فائر ہوا۔