بھارت نے اپنے آلہ کار پاکستان میں دہشتگردی کیلئے متحرک کر دیئے ہیں، ڈی جی آئی ایس پی آر

ڈی جی آئی ایس پی آر لیفٹیننٹ جنرل احمد شریف چودھری نے کہا کہ مستند معلومات ہیں بھارت نے اپنے آلہ کار پاکستان میں دہشت گردی کیلئے متحرک کر دیئے ہیں۔ افواج پاکستان اور خفیہ ایجنسیاں تمام صورتحال پر نظر رکھے ہوئے ہیں۔

نائب وزیر اعظم اسحاق ڈار اور ترجمان دفتر خارجہ کے ساتھ پریس کانفرنس کرتے ہوئے ڈی جی آئی ایس پی آر نے کہا کہ پہلگام واقعہ کو فوری طور پر مسلمانوں کے ساتھ جوڑ دیا گیا۔ اور بھارتی میڈیا نے فوری طور پر پاکستان پر الزام عائد کر دیا۔ بھارتی میڈیا کی جانب سے کہا جارہا ہے کہ پاکستانی ایجنسیوں نے یہ واقعہ کرایا۔ پہلگام واقعہ پر استعمال سوشل میڈیا اکاؤنٹس جعفر ایکسپریس حملے میں بھی استعمال ہوئے۔

انہوں نے کہا کہ 10 منٹ میں کیسے ممکن ہے کہ کوئی ایف آئی آر درج کرادے؟ جائے وقوعہ سے پولیس سٹیشن پہنچنے کیلئے کم سے کم 30 منٹ کا سفر ہے۔ الزام تراشی کی بجائے بھارتی حکومت کو سوالوں کے جواب دینا ہوں گے۔

ترجمان پاک فوج نے کہا کہ بھارت کی جانب سے الزامات لگائے گئے کہ لوگوں کو شناخت کر کے مارا گیا۔ اتنے کم وقت میں لوگوں کی شناخت کس طرح ممکن ہے؟ زپ لائن آپریٹر کی ویڈیو کو بنیاد بنا کر جھوٹا بیانیہ بنایا گیا۔ لیکن مقبوضہ کشمیر کے عوام نے بھارتی الزام تراشی کا بھانڈا پھوڑ دیا۔ دہشت گردی کے واقعات کو سیاسی مقاصد کیلئے استعمال کرنا بھارت کا وطیرہ ہے۔

لیفٹیننٹ جنرل احمد شریف چودھری نے کہا کہ مودی سرکار پاکستان میں دہشت گردی میں ملوث ہے۔ بھارت خود دہشتگرد ریاست ہے وہ ہم پر کس طرح الزامات لگا سکتا ہے۔ بھارت دہشت گردی کیخلاف پاکستان کی کامیابیوں کو سبوتاژ کرنا چاہتا ہے۔

انہوں نے کہا کہ پہلگام واقعہ کے بعد مقبوضہ کشمیر کے شہریوں کو فیک انکاؤنٹر میں شہید کیا گیا۔ بھارتی جیلوں میں قید بے گناہ پاکستانیوں کو دہشت گرد قرار دے کر قتل کیا جا رہا ہے۔ جیلوں میں قید پاکستانیوں پر تشدد کر کے زبردستی بیانات لئے جارہے ہیں۔ پہلگام واقعہ کو سندھ طاس معاہدے کی معطلی کیلئے استعمال کیا گیا۔