بھارت کی بلااشتعال فائرنگ, سول آبادی نشانہ… پاک فوج کا بھرپور جواب!

لائن آف کنٹرول (ایل او سی) پر بھارتی فوج کی بلااشتعال فائرنگ اور گولہ باری کے نتیجے میں 5 شہری شہید اور متعدد زخمی ہو گئے۔ پاک فوج نے مؤثر جوابی کارروائی کرتے ہوئے دشمن کی تین چوکیاں اور ایک ہیڈکوارٹر تباہ کر دیا۔

تفصیلات کے مطابق بھارتی فوج نے آزاد کشمیر کے کھوئی رٹہ سیکٹر میں شہری آبادی کو نشانہ بنایا، جس میں ایک نومولود بچی سمیت 4 افراد شہید اور 12 زخمی ہوئے۔ باغ کے علاقے میں ایک مکان پر گولہ گرنے سے ایک نوجوان جاں بحق جبکہ دو بہنیں زخمی ہو گئیں۔ تمام زخمیوں کو فوری طور پر قریبی اسپتال منتقل کر دیا گیا ہے۔

پاک فوج نے دشمن کی جارحیت کا بھرپور جواب دیتے ہوئے حاجی پیر سیکٹر میں بھارتی فوج کی تین چوکیاں تباہ کر دیں۔ اس دوران بھارتی فوج کی جھنڈا زیارت پوسٹ کو نشانہ بنایا گیا، جس سے دشمن کو بھاری جانی و مالی نقصان اٹھانا پڑا۔

مزید برآں پانڈو سیکٹر میں بھارتی فوج کا ہیڈکوارٹر تباہ کیا گیا جبکہ باغسر میں پاک فوج نے بھارتی کواڈ کاپٹر مار گرایا۔ آزاد کشمیر کے علاقے پناگ شریف میں ایک بھارتی ڈرون صبح 3 بجے نشانہ بنایا گیا جو درختوں پر آ گرا۔

فوجی حکام کا کہنا ہے کہ دشمن کی ہر جارحیت کا مؤثر جواب دیا جائے گا اور شہریوں کی حفاظت کے لیے تمام وسائل بروئے کار لائے جا رہے ہیں۔