بھارت نے دوبارہ حملہ کیا تو ایسا جواب دیں گے جو انہوں نے کبھی سوچا بھی نہ ہوگا، وزیر اعظم

سیالکوٹ: وزیراعظم شہباز شریف نے کہا ہے کہ پاکستان امن کا خواہاں ہے لیکن جنگ کے لیے بھی پوری طرح تیار ہے۔ اگر بھارت نے دوبارہ مہم جوئی کی تو ایسا منہ توڑ جواب دیں گے کہ تصور بھی نہیں کیا جا سکے گا۔

پسرور کینٹ میں افواجِ پاکستان کے افسران و جوانوں سے خطاب کرتے ہوئے وزیراعظم نے کہا کہ پاک فوج نے دشمن کو سبق سکھایا، ان کی قربانیاں قابلِ تحسین ہیں اور اس جنگ پر کتابیں لکھی جائیں گی۔

وزیراعظم نے نریندر مودی کو مخاطب کرتے ہوئے کہا کہ آگ لگانے کے بجائے آگے بڑھنے کی بات کریں، پاکستان کی امن کی خواہش کو کمزوری نہ سمجھیں۔

انہوں نے بھارت کی خفیہ مداخلت کا حوالہ دیتے ہوئے کہا کہ 1971 میں مکتی باہنی کو کس نے تربیت دی، دنیا جانتی ہے۔ بی ایل اے اور ٹی ٹی پی کے روابط بھارت سے ملتے ہیں۔

سندھ طاس معاہدے پر بات کرتے ہوئے شہباز شریف نے واضح کیا کہ پانی ہماری ریڈ لائن ہے، کوئی سمجھوتہ نہیں ہوگا۔ خون اور پانی ساتھ نہیں بہہ سکتے۔

انہوں نے رافیل طیاروں اور بھارت کی عسکری برتری کے دعووں کو مسترد کرتے ہوئے کہا کہ رافیل کے تکبر میں مبتلا بھارت کا غرور خاک میں ملا، یہ خطے کا تھانیدار بننے کا خواب ترک کرے۔

وزیراعظم نے کہا کہ پاکستان بھارت سے کشمیر سمیت تمام تصفیہ طلب مسائل پر جامع مذاکرات کے لیے تیار ہے، لیکن میٹھا میٹھا ہپ ہپ اور کڑوا کڑوا تھو تھو نہیں چلے گا۔