تووالو میں 2025 میں پہلی بار اے ٹی ایم نصب

دنیا بھر میں جہاں اے ٹی ایم مشینیں معمول کا حصہ بن چکی ہیں، وہیں بحرالکاہل کے ایک چھوٹے سے ملک تووالو میں حال ہی میں پہلی اے ٹی ایم مشین نصب کی گئی ہے، جو اس ملک کے لیے ایک بڑی پیش رفت سمجھی جا رہی ہے۔

تووالو، جو نو چھوٹے جزائر پر مشتمل ہے، سمندر کے درمیان واقع ہونے کے باعث دنیا سے کافی حد تک کٹا ہوا ہے۔ اسی وجہ سے یہاں جدید بینکاری سہولیات کا حصول اب تک ممکن نہیں ہو پایا تھا۔ تاہم 2025 میں یہ رکاوٹ ختم ہو گئی، جب وزیراعظم نے باضابطہ طور پر ملک کی پہلی اے ٹی ایم مشین کا افتتاح کیا اور خوشی میں کیک بھی کاٹا۔

اس سے قبل یہاں کے شہریوں کو رقم نکالنے کے لیے محدود اوقات میں بینک کا رخ کرنا پڑتا تھا یا نقد لین دین پر انحصار کرنا پڑتا تھا۔ اب اے ٹی ایم کی تنصیب سے انہیں چوبیس گھنٹے اپنی رقم تک رسائی ممکن ہو گئی ہے۔

تووالو کا کل رقبہ 10 مربع میل ہے اور یہ آسٹریلیا اور ہوائی کے درمیان بحرالکاہل میں واقع ہے۔ یہاں کا واحد ایئرپورٹ ہفتے میں چند پروازیں ہی سنبھالتا ہے، جس کا رن وے اکثر خالی ہوتا ہے اور مقامی افراد اسے کھیلوں کے میدان کے طور پر استعمال کرتے ہیں۔