شاہد آفریدی کی وزیراعظم شہباز شریف سے ملاقات، آپریشن بنیان مرصوص پر مبارکباد

اسلام آباد: قومی کرکٹ ٹیم کے سابق کپتان شاہد آفریدی نے وزیراعظم شہباز شریف سے ملاقات کی اور بھارت کے خلاف آپریشن بنیان مرصوص کی کامیابی پر مبارکباد پیش کی۔

شاہد آفریدی نے ملاقات کی تصاویر سوشل میڈیا پر شیئر کرتے ہوئے لکھا کہ آج وزیراعظم شہباز شریف سے ملاقات کا اعزاز حاصل ہوا، وزیراعظم اور دلیر افواج کو آپریشن بنیان مرصوص کی شاندار کامیابی پر یومِ تشکر کے موقع پر دل سے مبارکباد پیش کرتا ہوں۔

یاد رہے کہ 16 مئی کو بھارت کے خلاف تاریخی جوابی کارروائی پر ملک بھر میں یومِ تشکر منایا گیا۔ دن کا آغاز قرآن خوانی، خصوصی دعاؤں اور وفاقی و صوبائی دارالحکومتوں میں توپوں کی سلامی سے ہوا۔

آپریشن بنیان مرصوص کے دوران پاکستان نے بھارت کے کئی اہم عسکری اہداف کو کامیابی سے نشانہ بنایا، جن میں ادھم پور، پٹھان کوٹ، سرسہ ایئربیسز، براہموس میزائل اسٹوریج، اور اڑی کا سپلائی ڈپو شامل تھے۔ پاکستان نے بھارت کے 5 جنگی طیارے بھی مار گرائے، جن میں ایک جدید رافیل طیارہ شامل تھا۔

آپریشن بُنیان مرصوص کی کامیابی پر اسلام آباد میں "یومِ تشکر” کی خصوصی تقریب