پی ٹی آئی اختلافات میں شدت، شہرام ترکئی کا وزیر اعلیٰ گنڈا پور کیخلاف بڑا مطالبہ

پشاور: پاکستان تحریک انصاف (پی ٹی آئی) کی مرکزی قیادت میں اختلافات شدت اختیار کر گئے ہیں۔ رکن قومی اسمبلی شہرام خان ترکئی نے مرکزی قیادت سے مطالبہ کیا ہے کہ وزیراعلیٰ خیبر پختونخوا علی امین گنڈا پور کے حالیہ بیان کی تحقیقات کی جائیں۔

شہرام ترکئی کا کہنا ہے کہ ایسے بیانات سے بانی پی ٹی آئی کی تحریک کو نقصان پہنچے گا، اور پارٹی کی توجہ بانی پی ٹی آئی اور بے گناہ قیدیوں کی رہائی پر ہونی چاہیے۔

انہوں نے مزید کہا کہ وزیر اعلیٰ کو اپنی توانائیاں امن و امان کی بحالی اور گڈ گورننس پر مرکوز کرنی چاہیے۔

واضح رہے کہ علی امین گنڈا پور نے گزشتہ روز پارٹی کے بعض رہنماؤں پر سازشوں کا الزام عائد کیا تھا۔

دوسری جانب، سابق وزیر خزانہ خیبر پختونخوا تیمور جھگڑا نے خود پر خرد برد کے الزامات کی تحقیقات کیلئے عمران خان کی جانب سے بنائی گئی احتساب کمیٹی کی طرف سے بھیجے گئے سوالنامے کو سوشل میڈیا پر شیئر کیا۔

احتساب کمیٹی نے فیصلے کیا ہے کہ تیمور جھگڑا کے خلاف مکمل تحقیقات کیلئے عمران خان سے اجازت لی جائے گی، اور اجازت ملتے ہی محکمہ خزانہ اور صحت میں مبینہ کرپشن اور بے قاعدگیوں کی تحقیقات شروع کی جائیں گی۔