غیر ملکی میڈیا کا ایل او سی کا دورہ! پاکستان نے بھارت کا جھوٹ بےنقاب کر دیا

وفاقی وزارت اطلاعات نے بھارتی پروپیگنڈے کا مؤثر جواب دینے کے لیے غیر ملکی میڈیا کے نمائندوں کو لائن آف کنٹرول (ایل او سی) کے مختلف مقامات کے دورے کی دعوت دی ہے۔ یہ دورے آج اور کل (اتوار اور پیر) منعقد ہوں گے، جن میں ان علاقوں کا مشاہدہ کروایا جائے گا جہاں بھارت کی جانب سے پاکستان پر مبینہ شدت پسند تربیتی کیمپ چلانے کا الزام عائد کیا گیا ہے۔

وزارت کے ذرائع کے مطابق اس اقدام کا مقصد بھارت کی جھوٹی کہانی کو بے نقاب کرنا ہے، جس کے تحت وہ پاکستان پر عسکریت پسند تنظیموں کی پشت پناہی کا الزام لگاتا ہے۔ دورے کے دوران صحافیوں کو زمینی حقائق سے آگاہ کیا جائے گا تاکہ بھارتی دعوؤں کی حقیقت سامنے آ سکے۔

وزارت اطلاعات کے ترجمان نے کہا کہ پاکستان عالمی امن کے لیے پُرعزم ہے اور دہشت گردی یا کسی بھی قسم کی شدت پسندی کو مکمل طور پر مسترد کرتا ہے۔ انہوں نے مزید کہا، "پاکستانی قوم اپنی خودمختاری کے تحفظ کے لیے پرعزم ہے۔”