لاہور شہر کی اکلوتی خاتون ایس ایچ او پر مقدمہ درج

لاہور: پنجاب کے دارالحکومت لاہور میں پولیس کی تاریخ کا ایک غیرمعمولی واقعہ سامنے آیا ہے، جہاں ویمن پولیس اسٹیشن کی ایس ایچ او، سب انسپکٹر ثانیہ اشرف کے خلاف ناجائز اسلحہ رکھنے اور ڈکیتی کی واردات سے تعلق کے الزامات پر مقدمہ درج کر لیا گیا ہے۔

پولیس ذرائع کے مطابق، کاہنہ کے علاقے میں ہونے والی ڈکیتی کی تفتیش کے دوران گرفتار ملزمان نے انکشاف کیا کہ واردات میں استعمال ہونے والا 9 ایم ایم پستول، ایس ایچ او ثانیہ اشرف کے گھر سے حاصل کیا گیا تھا۔ ان انکشافات کی روشنی میں پولیس نے کارروائی کرتے ہوئے ثانیہ اشرف کے گھر پر چھاپہ مارا اور مذکورہ پستول برآمد کر لیا۔

پولیس حکام نے بتایا کہ برآمد ہونے والا اسلحہ ڈکیتی میں استعمال ہوا تھا، جس کے بعد تھانہ کاہنہ میں ثانیہ اشرف کے خلاف ناجائز اسلحہ رکھنے کی دفعات کے تحت مقدمہ درج کر کے انہیں گرفتار کر لیا گیا ہے۔

پولیس کا کہنا ہے کہ معاملے کی مکمل تفتیش جاری ہے اور یہ دیکھنے کی کوشش کی جا رہی ہے کہ آیا مذکورہ خاتون افسر اس واردات میں براہ راست ملوث تھیں یا محض اسلحہ ان کے علم کے بغیر استعمال ہوا۔