وزیر اعظم مارک کارنی نے انتخابات میں جیت کا اعلان کردیا

کینیڈا میں ایک بار پھر لبرل پارٹی کا راج، ایک سو سرسٹھ سیٹیں جیت کر حکومت بنانے کی راہ ہموار کرلی۔ وزیر اعظم مارک کارنی نے جیت کا اعلان بھی کردیا۔

انتخابی نتائج واضح ہونے کے بعد وزیراعظم مارک کارنی نے وکٹری سپیچ میں کہا کہ امریکی صدر ہمیں توڑ کر ہم پر قبضہ کرنا چاہتے ہیں لیکن ایسا کبھی نہیں ہوگا۔ یہ ملک ہمارا ہے اور ہم ہی فیصلہ کریں گے کہ یہاں کیا کرنا ہے۔ ٹرمپ کے ساتھ بیٹھے تو واضح کریں گے کہ کینیڈا کے پاس امریکہ کے علاوہ بھی کئی آپشنز ہیں جن پر وہ اپنی ترقی کی بنیاد رکھ سکتا ہے۔ مزید کہا اگر امریکہ عالمی معیشت میں اپنی پوزیشن سے ہٹتا ہے تو کینیڈا اس کا قائد بنے گا۔

میڈیا رپورٹس کے مطابق ہاؤس آف کامنز میں اکثریت کیلئے کسی بھی پارٹی کو ایک سو بہتر سیٹیں جیتنے کی ضرورت ہے۔ تاہم غیر حتمی نتائج کے مطابق لبرل پارٹی ایک سو سڑسٹھ نشستیں جیت چکی ہے اور اسے حکومت بنانے کیلئے زیادہ محنت کی ضرورت نہیں ہوگی۔ دوسری جانب کنزرویٹو پارٹی ایک سو پینتالیس سیٹیں جیت سکی جبکہ این ڈی پی نے سات سیٹوں پر کامیابی حاصل کی۔ انتخابات میں چھیہتر لاکھ بیالیس ہزار ووٹرز نے اپنا حق رائے دہی استعمال کیا۔

دوسری جانب کنزرویٹو پارٹی نے شکست تسلیم کرتے ہوئے نتائج کو سبق آموز قرار دے دیا۔ برطانیہ، چین، نیدرلینڈ، یورپی یونین، نیوزی لینڈ اور آسٹریلیا سمیت عالمی ممالک کے رہنماوں نے وزیراعظم مارک کارنی کو جیت کی مبارکباد دینا شروع کردی۔