پاکستان کے پاس میزائل بہت زیادہ ہیں، بھارتی میڈیا اور تجزیہ کاروں کا اعتراف

بھارت کے خلاف پاکستان کے آپریشن ‘بنیان المرصوص’ سے ہونے والی تباہی کے بعد بھارتی میڈیا اور تجزیہ کاروں نے اعتراف کیا ہے کہ پاکستان کے پاس میزائل بہت زیادہ ہیں۔

10 مئی کو صبح سویرے پاکستان کے آپریشن بُنيَانٌ مَّرْصُوْص کے تحت کیے گئے بھرپور حملوں میں بھارت کے کئی حساس فوجی مقامات کو نشانہ بنایا گیا۔ ادھم پور، آدم پور، پٹھان کوٹ، بھٹنڈا اور سرسہ کے ائیر بیسز، اڑی سپلائی ڈپو اور متعدد چیک پوسٹس تباہ کر دی گئیں۔

حملوں کے بعد بھارتی میڈیا اور سوشل میڈیا پر شدید ردعمل سامنے آیا۔ وائرل ویڈیوز میں نیوز اینکرز خوف اور حیرت میں چیختے نظر آئے۔ ایک اینکر نے کہا کہ پاکستان نے وہ میزائل ابتدائی مرحلے میں ہی استعمال کر دیے جو آخری ہتھیار سمجھے جا رہے تھے۔

دفاعی ماہرین کے مطابق پاکستان کا حملہ نہ صرف فوجی تنصیبات کو نشانہ بنانے کیلئے تھا، بلکہ اس کا مقصد بھارتی ائیر ڈیفنس سسٹم کی خامیوں کو آشکار کرنا بھی تھا، جس نے بھارت کی اسٹریٹجک دفاعی حکمت عملی پر کئی سوالات کھڑے کر دیے ہیں۔