میٹا کا فیس بک میں بڑی تبدیلی کرنے کا اعلان

اگر آپ کو فیس بک پر اسپام پوسٹس زیادہ نظر آتی ہیں تو یہ صرف آپ کا وہم نہیں۔ میٹا نے اعتراف کیا ہے کہ فیس بک فیڈ میں غیر متعلقہ اور خلل ڈالنے والی پوسٹس کی تعداد بڑھ گئی ہے، جس کے خلاف کریک ڈاؤن شروع کیا جا رہا ہے۔

میٹا کے مطابق، وہ ان صارفین کی پوسٹس کی رسائی محدود کر دے گا جو طویل، بے ربط یا گمراہ کن کیپشن استعمال کرتے ہیں۔ ایسے صارفین فیس بک سے آمدنی کے اہل بھی نہیں ہوں گے۔

کمپنی نے اعلان کیا کہ اسپام نیٹ ورکس اور جعلی کمنٹس پر سخت کارروائی کی جائے گی، اور ایسی پوسٹس کو فروغ دینے والے پیجز کو بند کر دیا جائے گا۔ ایک نیا فیچر بھی آزمائش کے مرحلے میں ہے جس سے صارفین گمنام رہ کر کمنٹس کو ڈاؤن ووٹ دے سکیں گے۔

یہ اقدامات فیس بک کو نوجوانوں کے لیے مزید پرکشش بنانے کی کوششوں کا حصہ ہیں۔ حال ہی میں ‘فرینڈز ٹیب’ کو واپس لایا گیا ہے اور مارک زکربرگ فیس بک کو اس کے پرانے انداز میں بحال کرنے کے خواہاں ہیں۔

میٹا کا کہنا ہے کہ وہ اوریجنل مواد تخلیق کرنے والے صارفین کو ترجیح دے گا اور ان کا درجہ بڑھایا جائے گا۔