وزیراعظم شہباز شریف کا انسانی سمگلنگ کے خاتمے کے لیے سخت کارروائی کا حکم

اسلام آباد:  وزیراعظم پاکستان شہباز شریف نے انسانی سمگلنگ کے خاتمے کے لیے تمام اداروں کو فعال کردار ادا کرنے کی ہدایت کرتے ہوئے کہا ہے کہ انسانی سمگلنگ میں ملوث افراد کے خلاف سخت کارروائی کی جائے گی۔ انہوں نے کہا کہ انسانی سمگلنگ کے مکروہ دھندے کو چلانے والوں کے خلاف قانونی کارروائی میں کوئی نرمی نہیں برتی جائے گی۔

وزیراعظم شہباز شریف کی زیر صدارت ملک میں انسانی سمگلنگ کے خاتمے کے لیے کئے گئے اقدامات کے حوالے سے ایک جائزہ اجلاس منعقد کیا گیا، جس میں انسانی سمگلروں کے خلاف کیے گئے اقدامات پر بریفنگ دی گئی۔ اجلاس میں بتایا گیا کہ جون 2023 سے دسمبر 2024 تک متعدد انسانی سمگلرز گرفتار ہو چکے ہیں، جبکہ کئی سہولت کاروں کو سرکاری ملازمت سے برطرف کیا گیا ہے اور وہ تادیبی کارروائی کا سامنا کر رہے ہیں۔

اجلاس میں مزید بتایا گیا کہ انسانی سمگلروں کے 500 ملین روپے سے زائد کے اثاثے ضبط کیے جا چکے ہیں اور اس عمل کو مزید تیز کرنے کے اقدامات کیے جا رہے ہیں۔ بریفنگ میں کہا گیا کہ انسانی سمگلروں کے مقدمات کے استغاثہ کے لیے خصوصی پراسیکیوٹر تعینات کیے جا چکے ہیں۔

اس موقع پر وزیراعظم نے کہا کہ انسانی سمگلنگ کے خاتمے کے لیے تمام متعلقہ ادارے اپنی ذمہ داریوں کو بھرپور طریقے سے نبھائیں، اور اس مکروہ دھندے کے ذریعے ملکی ساکھ کو نقصان پہنچانے والوں کے خلاف سخت قانونی کارروائی کی جائے۔

وزیراعظم نے ایف آئی اے میں افرادی قوت کی کمی کو فوری طور پر پورا کرنے کی ہدایت بھی کی۔ انہوں نے کہا کہ ہوائی اڈوں پر بیرون ملک سفر کرنے والے افراد کی سکریننگ کے لیے ایک معیاری نظام قائم کیا جائے۔ اس کے علاوہ وزارت اطلاعات و نشریات کو غیرقانونی بیرون ملک سفر اور انسانی سمگلنگ کے بارے میں مؤثر آگاہی مہم چلانے کی ہدایت بھی دی گئی۔

شہباز شریف نے ایف آئی اے کو ہدایت کی کہ وہ بیرون ملک انسانی سمگلنگ کے مکروہ دھندے میں ملوث انتہائی مطلوب سمگلروں کی حوالگی کے لیے انٹرپول سے تعاون حاصل کرے۔

اجلاس میں وفاقی وزیر اقتصادی امور احد خان چیمہ، وفاقی وزیر برائے اطلاعات عطا اللہ تارڑ اور دیگر متعلقہ اداروں کے اعلیٰ افسران بھی شریک تھے۔