وہ گھبرا گئے ہیں، چین کے جوابی ٹیرف پر ٹرمپ کا ردعمل

چین کی جانب سے امریکی ٹیرف کے جواب میں امریکی مصنوعات پر ٹیرف عائد کرنے کے اعلان پر ردعمل دیتے ہوئے امریکی صدر ڈونلڈ ٹرمپ نے کہا کہ چین گھبرا گیا ہے۔

امریکی صدر نے کہا کہ چین نے غلط قدم اٹھایا اور وہ گھبرا گئے، یہی وہ چیز ہے جسے چین برداشت نہیں کر سکتا۔

یاد رہے کہ گزشتہ روز امریکا نے چینی مصنوعات پر 34 فیصد اضافی ٹیرف عائد کیا تھا، جس کے بعد چینی مصنوعات پر ٹیرف کی مجموعی شرح 54 فیصد تک پہنچ گئی تھی۔

چین نے آج امریکی ٹیرف کے جواب میں امریکی مصنوعات پر 34 فیصد ٹیرف عائد کرنے کے ساتھ ساتھ اہم معدنیات کی برآمد پر بھی پابندیاں عائد کر دی ہیں۔

چینی وزارت تجارت نے 11 امریکی کمپنیوں کو ‘غیر معتبر اداروں’ کی فہرست میں شامل کر لیا ہے، جس کا مطلب یہ ہے کہ یہ کمپنیاں اب چین میں کاروبار نہیں کر سکیں گی۔

اس کے علاوہ، چین کے کسٹمز حکام نے امریکی چکن کی درآمد پر بھی پابندی عائد کر دی ہے، جس کا اطلاق 10 اپریل سے ہوگا۔