پاکستانی خواتین کرکٹ ٹیم ورلڈ کپ 2025 کے لیے بھارت نہیں جائے گی

پاکستان کرکٹ بورڈ (پی سی بی) کے چیئرمین محسن نقوی نے تصدیق کی ہے کہ قومی خواتین کرکٹ ٹیم رواں سال ہونے والے آئی سی سی ویمنز ورلڈ کپ 2025 کے لیے بھارت کا سفر نہیں کرے گی۔

لاہور سٹی کرکٹ ایسوسی ایشن (ایل سی سی اے) گراؤنڈ میں میڈیا سے گفتگو کرتے ہوئے محسن نقوی نے پاکستان کی خواتین ٹیم کو بنگلہ دیش کے خلاف سات وکٹوں سے فتح اور ورلڈ کپ کوالیفائنگ مہم میں ناقابلِ شکست رہنے پر مبارکباد دی۔

انہوں نے کہا کہ پاکستان کی عالمی ٹورنامنٹس میں شرکت "فیوژن فارمولا” کے تحت ہوگی، جو اس سے قبل آئی سی سی چیمپئنز ٹرافی 2025 کے لیے طے کیا گیا تھا۔ محسن نقوی نے واضح کیا، "پاکستان بھارت نہیں جائے گا، یہ فارمولا پہلے ہی طے پا چکا ہے۔”

جب ان سے نیوٹرل وینیو (غیر جانبدار مقام) پر میچز کے امکانات کے بارے میں پوچھا گیا تو انہوں نے کہا کہ اس حوالے سے حتمی فیصلہ میزبان ملک یعنی بھارت کو کرنا ہے۔

یہ بات قابلِ ذکر ہے کہ انٹرنیشنل کرکٹ کونسل (آئی سی سی) 19 دسمبر 2024 کو جاری کردہ پریس ریلیز میں اعلان کر چکی ہے کہ بھارت اور پاکستان کے درمیان آئی سی سی ایونٹس کے میچز 2024 سے 2027 کے سائیکل کے دوران غیر جانبدار مقامات پر کھیلے جائیں گے۔