پاکستان میں ایکس (سابقہ ٹوئٹر) سروس میں خلل، ڈیٹا سینٹر کی خرابی سبب

پاکستان میں ایکس (سابقہ ٹوئٹر) صارفین نے ہفتے کے روز سوشل میڈیا پلیٹ فارم پر سروس میں خلل کی شکایات کیں۔ رئیل ٹائم مانیٹرنگ کے مطابق، پلیٹ فارم کو ہفتے کو تقریباً 600 شکایات موصول ہوئیں۔

ایکس کی انجینئرنگ ٹیم نے اعلان کیا ہے کہ یہ مسائل ڈیٹا سینٹر کی خرابی کے باعث پیدا ہوئے ہیں جو جمعہ کی رات سے جاری ہے۔ بیان میں کہا گیا ہے کہ کچھ صارفین لاگ ان اور سائن اپ نہیں کر پا رہے جبکہ دیگر کو نوٹیفکیشنز اور پریمیم فیچرز میں تاخیر کا سامنا ہے۔

انجینئرنگ ڈپارٹمنٹ نے صبح 5 بجے جاری کیے گئے بیان میں کہا، "ہم ابھی بھی گزشتہ دن کی ڈیٹا سینٹر کی خرابی کے اثرات محسوس کر رہے ہیں۔ لاگ ان اور سائن اپ سروسز کچھ صارفین کے لیے دستیاب نہیں ہیں اور نوٹیفکیشنز اور پریمیم فیچرز میں تاخیر ہو سکتی ہے۔”

ایکس نے یقین دہانی کرائی ہے کہ ان کی ٹیم 24 گھنٹے کام کر رہی ہے تاکہ مسائل کو جلد از جلد حل کیا جا سکے اور صارفین کو جلد اپ ڈیٹس فراہم کی جائیں گی۔

جمعہ کو جاری کیے گئے ایک بیان میں بھی ایکس نے اس خرابی کا اعتراف کرتے ہوئے کہا کہ ٹیم مسئلہ حل کرنے کے لیے سرگرم عمل ہے۔ تاہم، کچھ صارفین نے قیاس آرائی کی ہے کہ امریکی ریاست اوریگن میں ایکس کے ڈیٹا سینٹر میں آگ لگ گئی ہے، تاہم اس کی سرکاری تصدیق نہیں ہوئی۔

میڈیا سے رابطہ کرنے پر ایکس نے اس حوالے سے کوئی تبصرہ نہیں کیا، جس سے مکمل صورتحال اب بھی غیر واضح ہے۔