پیٹرول اور ڈیزل کی قیمتوں میں بڑے اضافے کا امکان

مہنگائی سے پریشان عوام پر ایک اور بوجھ ڈالنے کی تیاریاں مکمل کر لی گئی ہیں، کیونکہ یکم جولائی سے پیٹرولیم مصنوعات کی قیمتوں میں نمایاں اضافہ متوقع ہے۔ ذرائع کے مطابق، پیٹرول اور ڈیزل کی قیمتوں میں آئندہ 15 روز کے لیے 11 سے 15 روپے فی لیٹر تک اضافے کا امکان ظاہر کیا جا رہا ہے۔

پیٹرولیم ڈویژن کے ذرائع نے بتایا ہے کہ ڈیزل کی قیمت میں 15 روپے فی لیٹر اور پیٹرول کی قیمت میں 11 روپے فی لیٹر تک اضافہ متوقع ہے۔ اس سلسلے میں اوگرا (آئل اینڈ گیس ریگولیٹری اتھارٹی) آج قیمتوں سے متعلق سمری وزارت پٹرولیم کو ارسال کرے گی، جس کے بعد پیٹرولیم مصنوعات کی نئی قیمتوں کا اعلان آج رات متوقع ہے۔

ذرائع کے مطابق، پیٹرولیم مصنوعات کی نئی قیمتوں کا حتمی فیصلہ وزیراعظم اور وزیر خزانہ کی مشاورت سے کیا جائے گا۔