پی ایس ایل 10 کے باقی تمام آٹھ میچز ملتوی کر دیے گئے ہیں، ترجمان پی سی بی

لاہور: ترجمان پی سی بی کا کہنا ہے کہ ایل او سی پر صورتحال مزید کشیدہ ہونے کے باعث ایچ بی ایل پی ایس ایل 10 کے باقی تمام آٹھ میچز ملتوی کر دیے گئے ہیں۔ بھارت کی جانب سے 78 ڈرونز کی دراندازی اور میزائل حملوں میں اضافہ ہوا ہے۔

ترجمان پی سی بی نے کہا کہ میچز کی منسوخی کا فیصلہ وزیرِاعظم شہباز شریف کی ہدایت پر کیا گیا۔ انہوں نے کہا کہ بھارتی جارحیت کے باعث قومی توجہ اور جذبات افواجِ پاکستان کے ساتھ جڑے ہیں۔ پی سی بی اور کھلاڑی شہداء کے لواحقین اور سیکیورٹی فورسز کے ساتھ مکمل یکجہتی کا اظہار کرتے ہیں۔

ترجمان پی سی بی نے مزید کہا کہ کرکٹ ہماری خوشی کا ذریعہ ہے مگر ملک کی خودمختاری اولین ترجیح ہے۔ ملکی صورتحال کے پیشِ نظر کرکٹ کو باوقار توقف دینا ضروری ہے۔

انہوں نے کہا کہ غیر ملکی کھلاڑیوں کے ذہنی سکون اور ان کے اہلِ خانہ کے خدشات کا احترام کرتے ہیں۔ پی سی بی نے تمام شراکت داروں، فرنچائزز، کھلاڑیوں اور اسپانسرز کی کوششوں کو سراہا۔