پی ٹی آئی نے قومی اسمبلی سے استعفوں کا امکان مسترد کر دیا

اسلام آباد: مخصوص نشستوں کے عدالتی فیصلے کے بعد پاکستان تحریک انصاف (پی ٹی آئی) نے قومی اسمبلی سے استعفوں کی خبروں کی تردید کرتے ہوئے اسمبلی کے اندر سے سیاسی جدوجہد جاری رکھنے کا اعلان کیا ہے۔

پی ٹی آئی رہنما ملک عامر ڈوگر نے کہا کہ ماضی میں اسمبلیوں سے باہر نکلنا بڑی سیاسی غلطی تھی جس کا خمیازہ آج تک بھگت رہے ہیں، دو صوبائی اسمبلیاں توڑنا بھی نقصان دہ ثابت ہوا۔

ان کا کہنا تھا کہ 85 ارکان کے بدلے مخصوص نشستیں "مالِ غنیمت” کی طرح دیگر جماعتوں میں بانٹی گئیں، جن کے پاس 17 نشستیں تھیں، انہیں دو تہائی اکثریت دے دی گئی۔

ملک عامر ڈوگر نے کہا کہ پارٹی چھوڑنے والے پنچھی پہلے ہی بھاری قیمت پر اُڑ چکے، اب مزید کوئی رکن پارٹی نہیں چھوڑے گا۔

انہوں نے دعویٰ کیا کہ پی ٹی آئی کے باقی 85 ارکان کے حلف نامے چیک کروانا غیر قانونی دباؤ کا حصہ ہے، ایسا ظلم دنیا کی کسی پارلیمنٹ میں نہیں ہوتا۔

یاد رہے کہ سپریم کورٹ نے مخصوص نشستوں سے متعلق کیس کا فیصلہ سناتے ہوئے گزشتہ سال 12 جولائی کا فیصلہ کالعدم اور پشاور ہائی کورٹ کا فیصلہ بحال کر دیا، جس کے نتیجے میں سنی اتحاد کونسل (پی ٹی آئی) مخصوص نشستوں سے محروم ہو گئی۔ یہ نشستیں اب مسلم لیگ (ن)، پیپلز پارٹی اور دیگر جماعتوں کو ملیں گی۔

فیصلے پر ردعمل دیتے ہوئے پی ٹی آئی نے کہا کہ ہمارے آئینی حق پر ایک بار پھر ڈاکا ڈالا گیا، مخصوص نشستوں کو انصاف کے برعکس "بانٹ” دیا گیا، پہلے بلے کا نشان چھینا گیا اور اب یہ حق بھی۔

پارٹی نے واضح کیا کہ ہم نظامِ انصاف سے مایوس ضرور ہیں، لیکن عوام اور عمران خان سے امید اب بھی باقی ہے۔