گنڈاپور کا لاہور ہائیکورٹ بار کو 50 ملین روپے کا عطیہ، بانی کی رہائی کیلئے متحد ہونے کی اپیل

لاہور: وزیراعلیٰ خیبرپختونخوا علی امین گنڈاپور نے لاہور ہائی کورٹ بار کو 50 ملین روپے کی گرانٹ دیتے ہوئے کہا کہ وکلاء پاکستان تحریک انصاف (پی ٹی آئی) کے بانی کی رہائی کیلئے متحد ہو جائیں۔

وزیرِ اعلیٰ خیبرپختونخوا نے لاہور ہائیکورٹ بار ایسوسی ایشن سے خطاب کرتے ہوئے خبردار کیا کہ "پاکستان کو سیاسی غلامی میں دھکیلا جا رہا ہے، جہاں فیصلے کرنے والے لیڈرز نہیں، غلام پسند کرتے ہیں۔ انہوں نے کہا کہ پاکستان کی خودمختاری خطرے میں ہے اور جمہوریت کو منصوبہ بندی کے تحت کھوکھلا کیا جا رہا ہے۔

گنداپور کا کہنا تھا کہ عمران خان کی قید کسی اقتدار کی خواہش کی وجہ سے نہیں، بلکہ "وہ قانون کی حکمرانی اور نبی کریم ﷺ کی حرمت کی بات کرتے ہیں، اسی لیے ان سے خوف محسوس کیا جاتا ہے۔”

انہوں نے ملکی سیاسی تاریخ کا حوالہ دیتے ہوئے کہا کہ "حکومتیں اغوا، مارشل لا اور پھانسیاں دے کر بنائی گئیں۔ بھٹو کو پھانسی دے کر بعد میں ایوارڈ دیا گیا — یہ سب ایک مخصوص بیانیے کے تحت کیا گیا۔”

وزیراعلیٰ نے کہا کہ ملک قرضوں میں ڈوبا ہے، اور ہماری قیادت زنجیروں میں جکڑی ہوئی ہے۔ انتخابات کا ڈھونگ رچایا جاتا ہے اور من پسند امیدواروں کو آگے لایا جاتا ہے۔

انہوں نے وکلاء سے مخاطب ہو کر کہا کہ آپ صرف وکیل نہیں، اب مدعی بھی بنیں، کیونکہ اسٹیبلشمنٹ کو آزاد آوازیں برداشت نہیں۔

آخر میں علی امین گنداپور نے لاہور ہائیکورٹ بار ایسوسی ایشن کے لیے 5 کروڑ روپے گرانٹ کا اعلان کرتے ہوئے کہا کہ خیبر پختونخوا پاکستان کے خوشحال ترین صوبوں میں شامل ہے۔