"پاک فوج دفاع وطن کے لیے پرعزم ہے، کسی بھی جارحیت کا سخت جواب دیا جائے گا”

ایبٹ آباد : ڈی جی آئی ایس پی آر لیفٹیننٹ جنرل احمد شریف چوہدری نے واضح پیغام دیتے ہوئے کہا ہے کہ پاک فوج دفاع وطن کے لیے مکمل طور پر پرعزم ہے اور کسی بھی بیرونی جارحیت کا جواب سخت اور شدید انداز میں دیا جائے گا۔

ایبٹ آباد میں مختلف جامعات کے اساتذہ اور طلبا سے خصوصی نشست کے دوران گفتگو کرتے ہوئے ڈی جی آئی ایس پی آر نے کہا کہ پاکستان نے دہشت گردی اور فتنۃ الخوارج کے خلاف مؤثر اقدامات کیے ہیں۔

انہوں نے حالیہ پاک-افغان کشیدگی، ملکی سلامتی کی صورتحال اور معرکۂ حق سمیت متعدد اہم موضوعات پر تفصیلی گفتگو کی۔

اس موقع پر اساتذہ اور طلبا کی بڑی تعداد نے شرکت کی اور شہداء و غازیانِ پاکستان کو زبردست خراجِ تحسین پیش کیا۔

ہم سب کو مل کر دہشت گردی کے ناسور کو جڑ سے اکھاڑ پھینکنا ہوگا، ڈی جی آئی ایس پی آر

وائس چانسلر ہزارہ یونیورسٹی ڈاکٹر اکرام اللہ خان نے اس موقع پر کہا کہ “پاک فوج وطن سے محبت اور قربانی کا حقیقی استعارہ ہے، جو ہمیشہ قوم کے دفاع کی پہلی صف میں کھڑی رہتی ہے۔”

اساتذہ کا کہنا تھا کہ “دشمن عناصر نوجوانوں کے ذہنوں کو گمراہ کرنے کی کوشش کر رہے ہیں، لہٰذا ہمیں اپنے طلبا کو درست اور مصدقہ معلومات فراہم کرنا ہوں گی۔”

طلبا نے کہا کہ انہیں فخر ہے کہ وہ ایسے ملک کے شہری ہیں جہاں افواجِ پاکستان جیسے ادارے نوجوانوں کو حوصلہ، رہنمائی اور اعتماد فراہم کرتے ہیں۔

انہوں نے مزید کہا کہ ڈی جی آئی ایس پی آر کے جوابات سے ملکی اور صوبائی حالات کے حوالے سے ان کے ذہنوں میں موجود تمام ابہام دور ہوگئے ہیں۔